«Se trata da morte de seres vivos indefensos realizada dun modo falso e ruin»
A asociación ecologista Verdegaia vén de denunciar que “esta semana asistimos en Vigo a outro corte de árbores completamente innecesario”, nesta ocasión na Avenida Gregorio Espino no treito entre San Roque e Travesía de Vigo, “como colofón a unha humanización”.
Verdegaia cualifica este corte coma un “arboricidio con aleivosía”, dado que se trata da “morte de seres vivos indefensos” e con aleivosía “polo modo falso e ruín como foi realizada”.
Durante a obra protexeronse as árbores mediante a colocación de táboas ao redor do tronco. “Inxenuamente consideramos que representaba un cambio na política de coidado das árbores pero unha vez mais o Concello asegurouse de defraudarnos e cortou todas as árbores cando a obra xa estaba practicamente rematada”.
Para Verdagaia é importante distinguir proxectos como as escaleiras mecánicas de Gran Vía, “que implican necesariamente o corte das árbores, doutros proxectos como a humanización de Gregorio Espino que para nada implicaba o corte das árbores. Simplemente é outra demostración da total ausencia de sensibilidade ambiental á hora de planificar unha obra pública”.
Para a asociación ecoloxista é “intolerable” que en poucos anos se teñan cortado centenas de árbores das máis diversas especies por unha mera cuestión estética.
“As árbores non se poden considerar como simple mobiliario urbano, é inadmisible que se cataloguen no mesmo ítem contable que as farolas ou as marquesiñas”. Verdegaia subliña que, entre outras moitas vantaxes, as árbores desempeñan un papel fundamental para contrarrestar a inxente cantidade de gases de efecto invernadoiro que diariamente xera o tráfico motorizado. “Non obstante, a resposta das autoridades municipais segue pasando por marxinalizar os medios de transporte máis sustentables e cortar árbores”.
