A dirección da Área Sanitaria de Vigo fixo efectico este xoves o “cese solicitado” por parte de 15 xefes de servizo e 8 xefes de unidade da Atención Primaria.
“En consecuencia, vaise iniciar o procedemento para o nomeamento dos novos responsables dos centros, que será de xeito paulatino, ao longo dos próximos meses”, informa o Servizo Galego de Saúde.
A Xerencia “agradece publicamente o labor daqueles profesionais que teñen decidido permanecer nos seus postos e liderar a modernización deste nivel asistencial”.
Para a dirección da Área Sanitaria viguesa a necesidade de concretar un novo modelo de Atención Primaria ven imposta pola obriga de dar resposta a dous condicionantes da asistencia actual: “a falta de médicos e o avellentamento poboacional”.
Ao seu xuízo, nos últimos meses tense producido un gran avance, coa posta en marcha dalgunhas decisións moi importantes, como o novo contrato de continuidade; a convocatoria dunha oferta de emprego público; e o investimento específico de 17,3 millóns de euros para este nivel asistencial.
O maior orzamento da historia
Dende a Xerencia sublíñase que “a realidade é que a Atención Primaria da área sanitaria de Vigo dispón do maior orzamento da súa historia e o máis elevado das Estruturas de Xestión Integrada de Galicia, superando os 250 millóns de euros”.
Ademais, nos últimos anos realizáronse importantes cambios organizativos, con dotación de recursos e tecnoloxía, que melloraron de forma determinante a atención ao paciente.
