A exposición “A nova Colección Colmeiro”, composta polos 21 óleos do artista que se incorporaron no ano 2017 aos fondos artísticos municipais, xunto a 145 obras sobre papel, prorrógase na planta baixa da Pinacoteca Francisco Fernández del Riego até o 27 de xaneiro de 2019.
Están presentes nela practicamente todas as etapas do autor: o seu retorno a Galicia nos anos 20 do pasado século, con vistas singulares do porto vigués; a súa interpretación crítica da realidade galega nos anos 30, en paralelo á definición do seu renovador estilo pictórico; o impacto da Guerra Civil española que o une en dramatismo a predecesores como Goya ou a contemporáneos como Picasso; o seu posterior exilio parisiense; o seu regreso e presentación en España nos anos 50, 60 ou 70.
Na colección tamén están todas as temáticas que lle son propias: principalmente o seu país galego, que capta a través da súa xente en romarías e traballos, das súas paisaxes; os traballos de estudio; as súas incursións na mitoloxía; os retratos… traballos todos eles nos que a muller brilla como gran protagonista. E todas estas temáticas desde a gran variedade de técnicas coas que as abordou: óleo, tinta e lapis.
