Os praceiros e as praceiras de Salceda de Caselas, en colaboración co Concello, distribuirán de balde bolsas reutilizables entre os seus clientes e clientas, para contribuír así á eliminación do uso de bolsas de plástico.
Dende o pasado 1 de xullo está prohibido subministrar bolsas de plástico de xeito gratuíto, polo que os establecementos están obrigados a cobrar entre 5 e 15 céntimos por elas coa finalidade de adaptarse á directiva europea, que ten como obxectivo último eliminar as bolsas de plástico para o 2021.
Segundo o Ministerio de Agricultura e Pesca, Alimentación e Medio Ambiente, cada persoa consume 144 bolsas de plástico anuais e o 90% son de un só uso, o que se ten convertido nun verdadeiro problema para o medio. Cada ano, ata 12 millóns de toneladas deste material chegan aos mares e océanos e afectan a máis de 550 especies.
Segundo subliña Loli Castiñeira, concelleira de Comercio: “os praceiros e praceiras de Salceda comprométense tamén co medioambiente, e con esta medida trasladaremos esa inquietude á clientela da Praza de Abastos. Temos que agradecer a implicación amosada, e lembrar que no Concello de Salceda sempre atoparán apoio para este tipo de iniciativas, favorables tanto para os veciños e veciñas como, sobre todo, para o medioambiente”.
A xuizo do alcalde, Marcos Besada, “no noso país estamos á cola na loita contra o plástico, e a día de hoxe xa tódolos océanos teñen restos de plásticos. Os nosos praceiros e praceiras están a dar un verdadeiro exemplo que a veciñanza de Salceda saberá agradecer”.
