O Concello de Nigrán pon en marcha, un ano máis, o programa de turismo social destinado á veciñanza da terceira idade co obxectivo de dar a coñecer aos maiores outros lugares de Galicia e facilitar a súa socialización.
O programa empeza o vindeiro día 18 cunha excursión á ‘XXI Festa do Lacón con Grelos’ de Cuntis, declarada ‘Festa de Interese Turístico de Galicia’ e que combina a degustación gastronómica nunha carpa con actuacións musicais e diversas actividades lúdico-culturais que atraen cada ano a miles de persoas.
O prezo é de 10 € e inclúe autobús e o xantar. A hora de saída é ás 10 da mañá dende o Concello de Nigrán e o regreso estimado ás 8 da tarde. Os interesados poden inscribirse dende o martes 6 de febreiro ao venres 9 de 9 da mañá a 2 da tarde, na Oficina de Información Cidadá do Concello de Nigrán.
