RGPD - Cookies
Vigo al día

Novas análises feitas este mesmo martes indican que a auga de Vigo «é potable ao cen por cen»

O alcalde afirmou este martes que as novas análises realizadas esta mesma mañá pola concesionaria Aqualia, «igual que as que fixeron onte», poñen de relevo que a auga de Vigo é «potable ao 100%», cumprindo todos os parámetros.

«A auga de Vigo é potable e non deixou de selo en ningún momento”, subliñou Abel Caballero, quen engadiu que aqueles que sementan «dúbidas» sobre a potabilidade da auga na cidade terán que explicarse.

O alcalde reiterou que a empresa concesionaria efectúa analíticas na auga cada 4 horas, que son remitidas á Xunta de Galicia, e os resultados revelan que se cumpren todos os parámetros de potabilidade.

Tras as chuvias deixadas nos últimos días pola borrasca «Ana», o encoro de Eiras está preto do 75% da súa capacidade, o que asegura subministro para seis meses. Caballero explicou que, salvo no verán, Eiras non pode superar o 77,7% do seu volume para poder facer fronte a episodios de fortes chuvias.

Con todo, Caballero insistiu na necesidade de executar o transvase de emerxencia desde o río Verdugo, porque «nada asegura que cheguemos ao comezo do verán co encoro cheo». A plena capacidade, Eiras ofrece subministro para seis meses, mais «queremos unha solución estable» que garanta auga para ata dous anos.

Abel Caballero sinalou que esta demanda xa a fixera él mesmo no 2011, ano da ultima seca, e a Xunta de Galicia «non fixo nada» pese a ser a súa «competencia e obrigación», pois o encoro vigués subministra a outros nove concellos da área metropolitana.

También te puede interesar