Nuns días quedarán rematados os traballos para a conexión á rede de saneamento no barrio de Pomar de Suso, en Salceda, obras que contan cun orzamento de 134.466,89 € con cargo a Augas de Galicia, financiado nun 75% cos fondos FEADER da Unión Europea. Unha vez finalizados os traballos, unhas 16 vivendas poderán conectarse directamente aos colectores do Consorcio do Louro. A obra supón a instalación dun total de 484 metros de colector, que desembocarán no tramo xa existente actualmente no mesmo barrio.
Trátase dun tramo prioritario para o Concello de Salceda de Caselas, xa que dará servizo a diversas vivendas de recente construcción, así como a outras que na actualidade estaban a ter serios problemas de residuos, sen as infraestructuras precisas para solventalos.
Con este novo treito, “Salceda dá un paso máis cara a consecución do saneamento integral do municipio, deixando a parroquia de Santa María de Salceda moi preto de conseguir estar saneada por completo”.
Carla Pérez, Concelleira de Medioambiente e Miguel González, Concelleiro de Vías e Obras, manifestaron a súa satisfacción por este novo tramo de saneamento, poñéndose a disposición de Augas de Galicia para entre todos acadar o mellor resultado posible neste a noutros proxectos que se desenrolen no municipio.
Pola súa banda o alcalde, Marcos Besada salientou que “o saneamento é un servizo fundamental para os veciños e veciñas. Queda moito por facer, máis seguimos a dar pasiños neste longo camiño ata lograr o saneamento integral do noso concello”.
