O vindeiro sábado 20 de maio, Salceda de Caselas acollerá a décima edición da andaina “Concello de Salceda”, incluída na Copa Galega de Andainas. A proba, organizada polo Centro Cultural O Coto de Budiño, en colaboración co Concello, ofrece tres alternativas de participación, podendo elexir 30, 33 ou 50 quilómetros.
A saída realizarase dende o centro cultural ás 9 da mañá, na parroquia de San Estevo de Budiño, e percorrerá diversos puntos do entorno natural do municipio así como dos concellos limítrofes, destacando as sendas e as áreas de lecer.
Para poder participar na andaina, é preciso inscribirse a través da páxina web www.aforna.org, abonando un prezo de 10 € para os socios e/ou federados e 12 para os non socios e/ou non federados. O prezo inclúe os diferentes avituallamentos que se disporán ao longo do percorrido, así como o xantar final no centro cultural.
As previsións, en base aos anos anteriores, son de que centos de persoas se acheguen a participar nesta proba, que ademáis da xeografía natural do Concello de Salceda, pasará tamén por puntos dos Concellos veciños de Tui e O Porriño.
“Estamos a falar dunha andaina coas mellores críticas tanto a nivel organización como a nivel de interese natural e de elección de percorrido”, sinalan dende a o Concello, engadindo que esta edición incluirá novos tramos de grande interese natural, como a subida ao Monte Aloia, que sen dúbida suporá un reto para as persoas participantes.
Segundo subliña o alcalde, Marcos Besada, “estamos ante unha nova oportunidade que Salceda non vai desaproveitar para abrir as portas do noso municipio nunha cita que se está a converter xa en referente neste tipo de probas. Os participantes nesta andaina poderán disfrutar das nosas paisaxes e das áreas que con tanto esforzo estamos a recuperar e a poñer en valor para o desfrute de veciños e visitantes”.
