Comarcas

13 persoas en situación de desemprego empezarán a traballar para o Concello de Salceda dende este venres

O Concello de Salceda contratará, dende o vindeiro venres 31 de marzo e ata o 31 de decembro, un total de 13 veciñas e veciños en situación de desemprego, ao abeiro do Plan Concellos da Deputación de Pontevedra.

As prazas que se van cubrir, son as de 1 animador sociocultural, 1 orientadora profesional para a inserción, 2 albaneis, 4 persoas de limpeza, 2 desbrozadores, 1 condutor de camión, 1 administrativa e 1 técnica de administración local.

A concelleira de Formación e Emprego e primeira tenente de alcalde de Salceda, Loli Castiñeira, sinalaba a importancia desta nova quenda de contratacións “que contribuirá a paliar a dura situación que viven moitos dos nosos veciños e veciñas que están en situación de desemprego”.

Por outra banda, as contratacións servirán para dar cobertura ás demandas da veciñanza, cubrindo as necesidades dos servizos básicos xestionados dende o propio Concello, tanto dentro como fora das instalacións municipais.

O Equipo de Goberno destacou a transparencia de todo o proceso, así como a igualdade de oportunidades. Mostra delo é que das 13 persoas contratadas solo unha traballou previamente no Concello de Salceda, sendo as 12 restantes a primeira ocasión en que teñen oportunidade de formar parte da plantilla municipal.

O alcalde de Salceda asegura que “a partir do venres, 13 veciños e veciñas de Salceda contan con unha oportunidade de traballo moi necesaria en cada un dos casos. A transparencia coa que se levou a cabo todo o proceso garante que as persoas seleccionadas sexan merecedoras do posto, e que accedan ao mesmo en igualdade de oportunidades co resto de candidatos”.

También te puede interesar