A Asociación Veciñal de Teis xa leva recollidas ata o de agora máis de 1.100 sinaturas para reivindicar ao Concello un autobús directo desde Teis ata o hospital Alvaro Cunqueiro.
A asociación veciñal iniciou esta campaña fai só dez días e continuará durante as vindeiras semanas, ademais de solicitar por escrito unha nova xuntanza urxente coa concelleira de Transporte e de convocar unha nova manifestación o martes 11 de outubro ás 19.00 horas desde o mercado de Teis.
Desde a apertura do Álvaro Cunqueiro hai xa un ano «son continuas as queixas da veciñanza» que utiliza o autobús urbano cara o novo hospital desde Teis, xa que os usuarios teñen que desprazarse ata a avenida de García Barbón, na Casa de Artes e Oficios, para coller o H1 ou ata os Choróns para coller o H2. Ademais, a liña H1, non funciona nin sábados nin domingos e festivos.
Desde a Asociación defenden que «debe ser unha prioridade mellorar a conexión do autobús urbano co hospital Álvaro Cunqueiro desde Teis» e que se debe «esixir á empresa concesionaria Vitrasa que mellores este servizo debidamente».
