O Diario Oficial de Galicia (DOG) publicou onte, luns de agosto, a resolución da Xerencia da Área Sanitaria de Vigo pola que se pon en marcha un concurso de méritos para a contratación de 45 facultativos especialistas. A publicación no DOG abre o prazo de 30 días hábiles para a presentación de solicitudes dos interesados.
Segundo subliña o Servizo Galego de Saúde (SERGAS), “trátase da maior provisión de prazas de persoal médico que se leva a cabo nos últimos anos na área sanitaria de Vigo e afecta a un total de 24 servizos hospitalarios, tanto do Álvaro Cunqueiro como do Meixoeiro e do Nicolás Peña”.
Os facultativos especialistas ocuparán prazas de interino en praza vacante na maioría dos casos. Só en dous trátase de substitución en reserva de praza. A Xerencia da Área Sanitaria subliña que “deste xeito se culminara o proceso iniciado a principios de 2016, polo cal se ten procedido a dotar de vínculos indefinidos a máis de 300 profesionais da nosa área, correspondentes a diferentes categorías, reducindo deste xeito a taxa de eventualidade”.
Os servizos que se beneficiarán destas prazas son: Análises Clínicas, 2; Anatomía Patolóxica, 2; Anestesioloxía e Reanimación, 4; Anxioloxía e Cirurxía Vascular, 1; Cardioloxía, 2; Cirurxía Cardiovascular, 1; Cirurxía Ortopédica e Traumatoloxía, 4; Cirurxía Pediátrica, 1; Cirurxía Xeral e do Aparello Dixestivo, 4; Dermatoloxía Médico-Cirúrxica e Venereoloxía, 2; Endocrinoloxía e Nutrición, 2; Hematoloxía e Hemoterapia, 1; Inmunoloxía, 1; Medicina Física e Rehabilitación, 2; Medicina Intensiva, 1; Microbioloxía e Parasitoloxía, 1; Neuroloxía, 1; Obstetricia e Xinecoloxía, 2; Oftalmoloxía, 2; Pediatría, 4; Pneumoloxía, 1; Psiquiatría, 1; Radiodiagnóstico, 1; e Xeriatría,2.
Os aspirantes han de dispoñer dos títulos correspondentes para cada unha das especialidades ás que opten. A convocatoria resolverase, trala proposta realizada pola Comisión de avaliación á Xerencia, e se procederá á cobertura das prazas de acordo coa puntuación obtida pola valoración dos méritos aportados, segundo o baremo establecido na propia convocatoria.
De ser o caso, a Comisión de avaliación poderá acordar a realización dunha entrevista persoal con cada un dos aspirantes na que se valorará a adaptación das características e competencias dos aspirantes ás especificidades concretas das prazas ofertadas.
