A Garda Civil atopou esta mañá tendido nunha pista paralela á N-550 a un octoxenario desaparecido este sábado en Mos. O home caera por un barranco e, a parte dunha forte dor das costas, presentaba algunhas feridas das que está a ser atendido no Hospital Álvaro Cunqueiro de Vigo.
O octoxenario, que vive coa súa familia no Pombal e ten problemas de saúde, non estaba na casa cando os seus familiares volveron cara as 13.00 horas. Logo de buscar polos arredores e preguntar nos hospitais, os familiares deron aviso ao 112 Galicia, que deu aviso á Garda Civil.
Morre tras sufrir un infarto mentres conducía
Pola súa banda, esta mañá falecía o condutor dun turismo que entrou en parada cardiorrespiratoria cando circulaba pola parroquia ceense de Brens. Os médicos de Urxencias Médicas trataron de reanimalo en repetidas ocasións, pero nada se puido facer por salvar a vida do home. Os veciños deron a voz de alarma cando viron ao vehículo saírse da vía.
Ademais, o helicóptero medicalizado do Urxencias Sanitarias tivo que evacuar a unha persoa que sufriu graves lesións ao caer ao Río Ganceiros, en Lobios, e bater contra unhas rochas. Os feitos ocorreron sobre as 09.40 horas, momento en que o 112 Galicia puxo en marcha un dispositivo de rescate ao atoparse fóra da auga á beira do río pero nunha zona de difícil acceso.
