A Comisión Galega de Protección Civil aprobou este luns o plan sectorial de asistencia a vítimas de accidentes de aviación civil e aos seus familiares, un novidoso plan por primeira vez adaptado á directriz estatal para aplicar no territorio galego.
Este, que desde hoxe está plenamente operativo, busca ofrecer a mellor asistencia en caso dun sinistro aéreo e garantir a coordinación absoluta entre todas as administracións implicadas, así como coas compañías aéreas e os xestores aeroportuarios.
A Comisión Galega de Protección Civil é un órgano que coordina ás administracións públicas en Galicia en materia de protección civil e emerxencias e este luns tamén revisou o Plan Especial de Protección Civil ante o risco de inundacións, para adaptalo á nova normativa. Ademais, segue a traballar nos plans de emerxencia ante rotura de presas.
