Arredor de 150 delegados sindicais da CIG concentráronse este martes ás portas da Inspección de Traballo de Vigo para denunciar que o aumento da precariedade laboral estase a traducir nun aumento da siniestralidade no traballo, con accidentes cada vez máis graves. Así, recordaron aos dous traballadores que xa perderon a vida en accidentes laborais durante o mes de abril na cidade ou o traballador dunha auxiliar do naval que morría a pasada semana tras caer dunha altura considerable.
Ao remate da concentración entregouse un escrito dirixido ao xefe da Inspección de Traballo no que se incidiu na relación directa entre a siniestralidade laboral e a precariedade e a falla de protección e garantías, xa que á accidentalidade en moitos casos «engádese a falta de medios de seguridade ou que estes sexan insuficientes ou inadecuados». Tamén reclaman que Inspección de Traballo atenda as denuncias que se presentan con celeridade e que se incrementen as actuacións de oficio.
