Maio comeza con festa da boa. Esta fin de semana chega unha nova edición do Freixo Rock, dous días cargados de música, acampada de balde, comida e bebida a prezos populares e carpa, entre outras moitas cousas. E chega este 6 e 7 de maio cun cartel musical do máis completo, combinando estilos, procedencias e temáticas.
O festival arranca o venres cun gran abano de artistas da terra: dende os Cuchufellos ata Cé Orquestra Pantasma, pasando polos pontareanos de Skandalo GZ ou os vigueses de Keltoi! e Os Podridos. Estilos Oi!, punk e ska xunto a música de Galicia.
Xa o sábado o mapa esténdese en numerosas direccións: os asturianos Desakato, o grupo bilbaíno Manifa ou os madrileños Oferta Especial. Tamén haberá unha gran representación viguesa esa noite, con grupos como Liska! ou Ovos Podres, que acompañarán a Demencia Sonora e a Leo i Arremecághona.
O festival arrancará o venres ás 21 horas cunha actividade especial: unha sesión de ‘punkipilates’. Unha hora despois arrancará a quenda de concertos no campo de fútbol situado á beira do local da asociación de veciñas e veciños de Freixo. Nesta ocasión o único requisito para poder acceder ao recinto de concertos será realizar unha consumición, xa que a organización leva organizado diversas actividades para recaudar o financiamento necesario, como unha andaina terrorífica, baixadas de carros de bolas, bingos, tuppersex ou poñendo postos nas festas da Reconquista de Vigo e na Brincadeira de Bouzas.
