O goberno local de Vigo aprobou este venres o texto do convenio de colaboración coa Deputación de Pontevedra a través do que se achegarán 600.000 euros para acondicionar a sede viguesa da UNED no Auditorio Mar de Vigo e a sala de lectura-biblioteca, que se converterá na máis grande de Vigo.
Esta subvención será empregada para o acondicionamento das prantas do Auditorio que acollen as instalacións da UNED, que en Vigo xa conta con cinco carreiras: Dereito, Enxeñería en Tecnoloxías da Información, Enxeñería Informática, Turismo e Educación Social). A estas hai que sumarlles outras oito: Estudos Ingleses, ADE, Ciencias Ambientais, Psicoloxía, Ciencia Política e da Administración, Xeografía e Historia, Pedagoxía e Historia da Arte. Caballero avanzou que de cara ao próximo ano o goberno que preside solicitará á UNED que Vigo acolla outros cinco graos máis.
