RGPD - Cookies
Vigo al día

O Goberno de Galicia garante a execución da estación intermodal de Vigo logo dun trámite de «7 ou 8 meses»

A conselleira, o alcalde, a presidenta da Deputación e a ministra de Fomento en funcións mantiveron unha xuntanza este luns, en Madrid
A conselleira, o alcalde, a presidenta da Deputación e a ministra de Fomento en funcións mantiveron unha xuntanza este luns, en Madrid

A conselleira de Infraestructuras salientou  hoxe que a modificación da Lei do Solo proposta polo Goberno de Galicia garante a execución da estación intermodal de Vigo mediante unha solución urbanística áxil e segura. Ethel Vázquez, acompañada pola directora xeral de Mobilidade, Helena de Lucas e a secretaria xeral de Ordenación do Territorio e Urbanismo, Encarnación Rivas, mantivo este luns unha xuntanza de traballo coa ministra de Fomento en funcións, Ana Pastor, a presidenta da Deputación, Carmela Silva, e o alcalde de Vigo, en Madrid.

O Goberno galego, indica nun comunicado, “ofreceu a máxima colaboración para acadar unha solución urbanística que permita desenvolver a estación intermodal de Vigo con todas as garantías xurídicas”.

Vázquez lembrou que é responsabilidade do Concello achegar as solucións urbanísticas para os proxectos tan importantes que están planificados ou en marcha na cidade. Non obstante, fixo fincapé no “interese do Goberno de Galicia en que estes proxectos necesarios e interesantes para Vigo e os vigueses saian adiante, motivo da participación nesta xuntanza a tres bandas co fin de atopar solucións conxuntas e eficaces”.

A conselleira indicou que se trata dun trámite de entre 7 e 8 meses dende a presentación do proxecto, que, en todo caso, permitiría executar a estación intermodal, dado que se trata dun proxecto de evidente utilidade pública, sempre e cando conte co visto bo do Concello.

Cómpre lembrar que no proxecto da intermodal conflúen o Ministerio de Fomento, que logo de executar a estación do AVE, ten en fase de contratación as obras do centro Vialia. O Goberno de Galicia, que xa traballa na redacción do proxecto construtivo da estación de autobuses integrada na mesma parcela; e o Concello, que segundo os seus propios compromisos e seguindo o modelo do resto das cidades, debe proporcionar os accesos que garantan a funcionalidade da estación.

También te puede interesar