A Deputación de Pontevedra ven de aprobar a adxudicación dun contrato por valor de máis de 100.000 € para que o viveiro de empresas do Polígono de Barro-Meis conte con mobiliario e equipamentos adecuados para comezar a funcionar.
Este contrato de subministro, mediante procedemento aberto, e por valor de 119.968,84 € (IVE engadido) ten por obxectivo dotar de mobiliario ó edificio destinado a viveiro de empresas no polígono de Barro – Meis. En concreto, mesas de oficina, mesas auxiliares, electrificación, sillas, sofás, armarios, estanterías, rótulos, directorios, alfombras, percheiros, etc. para que o viveiro de empresas poida acoller, canto antes, ós emprendedores.
Neste espazo, realizaranse ademais, no marco do convenio coa Escola de Organización Industrial e na aposta que a Deputación de Pontevedra ten na creación e impulso do emprego, accións de coworking empregando a metodoloxía Lean Startup, con actuacións de formación e titorización de persoas, promovendo o traballo por conta allea e a creación de empresas.
