O 061 atendeu a 61 persoas debido a 42 accidentes de tráfico rexistrados durante a fin de semana nas estradas galegas, das que dúas morreron. A Central de Coordinación recibiu 54 chamadas, entre as 3 da tarde do venres e as 12 menos un minuto da noite deste domingo. O maior número de atencións por sinistros rexistráronse o domingo, con 19 incidentes.
Os recursos sanitarios mobilizados polo 061 ascenderon a 59. En concreto, as ambulancias medicalizadas realizaron unha saída; as asistenciais, 47; e as convencionais, tres; mentres que o helicóptero medicalizado asistiu dúas persoas e os médicos de Atención Primaria prestaron asistencia en seis ocasións.
En 50 casos os feridos foron levados aos centros sanitarios correspondentes e en 9 ocasións recibiron asistencia no lugar do incidente sen necesitar traslado, mentres dúas persoas morreron no punto do sinistro a pesar dos esforzos sanitarios.
Pontevedra, con 17, foi a provincia que rexistrou máis accidentes durante os desprazamentos da fin de semana; seguida da Coruña, con 12; Lugo, con sete; e Ourense, con seis.
