A Organización de Produtores de Leite-OPL convocou os gandeiros a unha manifestación, este luns, día 6 de abril (12 h.),en Compostela, para protestar contra a «situación crítica» dos prezos e demandar ao Goberno galego que interceda en defensa do sector.
Na mobilización, ante a sede da Consellería do Medio Rural e do Mar en San Caetano, participarán entidades vinculadas co sector produtor lácteo dado que, segundo a OPL, «esta grave situación» afecta indirectamente a todas as empresas de servizos auxiliares para o campo e os gandeiros.
A Organización de Produtores de Leite explicou que se manifesta de novo «en defensa dos intereses dos gandeiros, tras as numerosas solicitudes recibidas dende toda Galicia», nuns «momentos cruciais e moi delicados».
A OPL lembra que a entrada en vigor do novo paquete lácteo, o «espolio patrimonial das cotas», a «desinformación á que se someteu ao sector coa supertaxa e as actuais imposicións da industria».
«É a toda luces necesario un sector forte e unido ante os abusos que realizan as administracións, industria, e distribución, dado que a actual situación de imposición de contratos conducirá á ruína total en caso de que non se tomen as medidas oportunas para controlalo», considerou a OPL.
