A Axencia Tributaria efectuou o 96,53% das devolucións correspondentes en Galicia á Campaña da Renda de 2013, de forma que, a peche de 2014, un total de 885.445 declarantes na Comunidade de 917.301 percibiran o seu diñeiro. Segundo informou Facenda este mércores, isto tradúcese en que ata finais de 2014 se devolveron en Galicia 556,1 millóns de euros dun total de 601,2 millóns (o 92,5%).
En Ourense efectuouse a devolución de 55,7 millóns de 58,8 millóns (94,81%); en Vigo, 86,7 millóns de 93,7 millóns (92,55%); na Coruña, 248 de 268,2 millóns de euros (92,48%); en Pontevedra, 102,5 millóns de 110,9 millóns (92,42%); e en Lugo, 62,9 millóns de 69,4 millóns (90,69%).
As presentacións por Internet da declaración da renda de 2013 en Galicia supuxeron o 72,04%, é dicir, 911.189 expedientes do total de 1.264.806.
