A Confederación Intersindical Galega (CIG) entregou este venres nos Xulgados de Santiago a documentación que, indica a central, é a «proba» de que a muller do que fora director xeral de Caixa Galicia, José Luis Méndez, comprou inmobles que «pertencían á corporación da caixa por debaixo do valor de taxación».
«Entendemos que aquí hai un delito contra o propio patrimonio da corporación Caixa Galicia e vimos a presentar o escrito ante a Fiscalía para que se abra o procedemento penal que estime oportuno e que isto non quede sen pasar polo xulgado e coa condena oportuna», explicou, en declaracións aos medios, o secretario xeral da central nacionalista, Suso Seixo.
Esta actuación prodúcese despois de transcender que documentación recibida pola CIG, de forma anónima, indica que estas actividades levaríanse a cabo «por debaixo do valor da taxación» e cando xa se coñecía a fusión das extintas caixas galegas. En total, hai operacións por 1,8 millóns.
«Entrégase documentación referida a todo o que é a compra de locais, de pisos, por parte da muller de José Luis Méndez e, a parte diso, datos do que é a propia taxación que estaba feita deses locais», detallou Suso Seixo ante os Xulgados.
