A declaración institucional que tradicionalmente o Parlamento de Galicia aproba con motivo do aniversario do inicio do éxodo do pobo palestino pareceulle mal ao embaixador de Israel Alon Bar, que incluíu á Cámara galega entre os seus «peores e máis extremistas inimigos».
No mencionado texto, rubricado por todos os deputados, reclámase da comunidade internacional que esixa a Israel «o cumprimento das resolucións de Nacións Unidas o respecto absoluto dos dereitos humanos dos palestinos, o respecto absoluto dos dereitos colectivos do pobo palestino e o recoñecemento do dereito ao retorno das persoas e comunidades ás terras e casas de que foron expulsadas».
Este último punto é o que molestou o diplomático. «Con esta esixencia, o Parlamento de Galicia únese aos peores e máis extremistas inimigos de Israel, xa que de feito suporía a desaparición do Estado de Israel,», advirte o embaixador nunha carta remitida á presidenta da Cámara, Pilar Rojo.
Bar subliña que chama a atención sobre que esta petición –«aprobada precisamente o día do aniversario da independencia de Israel», quéixase -sitúa a Cámara galega «fóra» do «consenso da Unión Europea sobre os parámetros do futuro acordo de paz entre palestinos e israelís», así como «das posicións defendidas polos sucesivos gobernos de España».
