Quedou moi preto das medallas. A só un paso. Laura Dosil (-59) gañou os dous primeiros combates e caeu nos cuartos de final do Mundial Júnior fronte a representante de Grecia nun apertado combate (4-2) que se decidiu a favor da grega a falta de dez segundos para o final. Moi bo traballo de Laura na súa primeira participación nun mundial.
Comezou a competición contra a francesa Elodie Zahlan e logrou o pase con dous puntos de diferenza (8-6). Na segunda rolda enfrontouse á representante de Azerbaian, Zeyvi Karimova, e neste combate foi moi superior á súa rival (9-2), logrando o pase para os cuartos de final.
Aquí esperaba a taekwondista de Grecia, Maria Moysidou, nun rifado enfrontamento no que estiveron sempre igualadas. Tanto, que todo se decidiu finalmente a falta de 10 segundos para o remate do combate, e así escapouse a medalla de bronce para a galega.
Foron tres as representantes galegas (Sabela López, Ruth Tilve e Laura Dosil) no Mundial de Taekwondo Júnior, que se está a celebrar en China Taipei coa participación de preto de 1.000 deportistas representando a 100 países de todo o mundo.
