A Asociación Veciñal de Teis denunciou este luns que “en menos de 24 horas”, producíronse dúas roturas en tubaxes do barrio, este domingo na ‘Subida á Ponte’ e hoxe na avenida de Galicia. Segundo indica, estás roturas “provocaron novas molestias a veciñanza destas rúas”, co corte do subministro de auga desde 8 da mañá.
Os veciños subliñan que “nestas dúas rúas as roturas son continuas e non pasan dúas semanas sen elas, situación que padecemos desde hai anos”. A aasociación lembra que leva meses demandando a substitución das tubaxes de abastecemento de auga con continuas roturas e que “a resposta do Concello é moi lenta e insuficiente, pois aínda que no Plan de investimento de Aqualia para 2013, recolle por exemplo a actuación na avenida de Galicia, a día de hoxe está obra non se realizou” e, no proxecto, aprobado recentemente pola xunta de goberno do Concello para a renovación de redes de abastecemento e saneamento na parroquia de Teis, fase 1, “non se inclúe nin a actuación na Avenida de Galicia, nin na Subida á Ponte”.
