A costa galega seguirá afectada este domingo por un temporal de nivel laranxa, con ondas que chegarán aos 7 metros nas primeiras horas do día, de acordo co boletín de tempo meteorolóxico adverso de Meteogalicia.
Deste modo, tras activarse a alerta para este sábado, o mal estado do mar manterase durante toda a xornada do domingo, para a que esperan ondas do noroeste superiores aos 5 metros en calquera franxa do día.
Ademais, Meteogalicia avisa de que as malas condicións continuarán o luns, para cando se prevé que unha borrasca moi profunda situada ao Norte de Irlanda provoque tempo adverso por vento e chuvia en terra e “unha situación moi complicada no mar”.
