Este luns e mañá, martes, días 9 e 10 de decembro, a Sanidade Pública Galega está en folga, convocada polas centrais sindicais para protestar polas medidas de recorte e nos medios humanos, ademais de para pedir a «inmediata paralización» da aplicación do copagamento en medicamentos.
Os convocantes salientan o seu rexeitamento aos «recortes en medios humanos», sobre todo en persoal facultativo, que repercuten «negativamente na asistencia sanitaria», tanto en centros de saúde como hospitais. Por iso, esixen a reedición da taxa de reposición e os contratos lixo.
Os sindicatos esixen, ademais, a «inmediata paralización» de calquera intento de aplicación do copagamento en medicamentos hospitalarios, que consideran «un atentado contra o dereito á vida dos enfermos» e «unha ofensa á ética profesional» dos facultativos que os atenden.
Outro dos puntos solicitados é a apertura dunha negociación sobre as áreas de xestión clínica para que «deixen de ser un instrumento para privatizar a sanidade pública». Tamén piden iniciar unha negociación para concretar o proceso de recuperación dos «dereitos laborais e retributivos» que perdeu o sector dos facultativos durante a crise.
A folga pecharase mañá cunha ‘Grande Marea Branca’ pola sanisade pública á que está convocado todo o persoal sanitario, traballadores de hospitais e centros de saúde e” a toda a sociedade en xeral”, e que levarase a cabo en 13 manifestacións e concentracións noutros tantos concellos galegos.
