Nun comunicado remitido aos medios de comunicación, a Confederación Española da Policía (CEP) culpou a un mando policial da UIP (Unidades de Intervención Policial) das feridas ocasionadas a cinco axentes antidisturbios pola súa ‘deficiente xestión’ durante os incidentes que se produciron este mércores en Vigo na manifestación contra a Lei Orgánica para a Mellora da Calidade Educativa (Lomce).
«Os policías víronse abocados a cumprir unhas ordes incoherentes e imprecisas, cando non inexistentes as cales emanaban dun responsable do dispositivo que, chegado o momento dos disturbios, eludiu toda responsabilidade, abandonando aos seus homes á súa sorte», di o comunicado emitido polo Comité Rexional de Galicia da CEP.
A Confederación de Policía acusa a este responsable policial de incorrer «nun acto de completa ineptitude e desparecer do mapa privando aos seus policías dun obxectivo punto de vista externo e dunha axeitada coordinación».
A CEP engade que “o que debía ser unha sinxela e rápida intervención converteuse nunha actuación lamentable, achacable en exclusiva a este mando policial, na que os funcionarios se limitaron a repelar unha e outra vez unha serie de agresións sen saber onde nin cando lles caían as pedradas», insiste a nota.
Esta organización informa de que remitiu á Xefatura Superior de Policía de Galicia un escrito no que piden explicacións acerca de o sucedido.
