RGPD - Cookies
Galicia

Os tres responsables de ADIF que testificaron sobre o accidente de Angrois repiten: a curva era segura

Os tres cargos de Adif que este xoves prestaron declaración ante o xuíz Luis Aláez en relación ao accidente de tren de Angrois , seguiron a liña argumental dos seus dous compañeiros que testificaron antes que eles: segundo a normativa, tanto o sistema de seguridade como a sinalización na zona do sinistro eran as correctas.

Durante máis de cinco horas o xefe de Inspección da Xerencia de Área de Seguridade na Circulación Noroeste, José Antonio G.D., e os inspectores Carlos A.G. e Roberto S.A, coincidiron no seu discurso co mantido durante a xornada do mércores polos outros cargos imputados. Os tres subliñaron que a seguridade da vía e as indicacións eran as que manda a normativa e, polo tanto, as axeitadas. Non obstante, rexeitaron, a preguntas dos avogados, entrar en consideracións persoais sobre se fosen necesarios sistemas de seguridade adicionais.

Coas tres declaracións deste xoves conclúen as comparecencias ordenadas polo xuíz Aláez, dacordo co listado de responsables de seguridade remitido por Adif. No seu último auto, o maxistrado reclamaba ao administrador de infraestruturas que identificase máis dunha vintena de cargos, entre anteriores responsables de seguridade e membros do consello de administración, co fin de imputalos.

Adif, que recorreu a imputación dos seus responsables, xa anunciou que non entregará este listado ata que a Audiencia Provincial de A Coruña resolva o seu recurso. Non obstante, fontes do Tribunal Superior de Xustiza de Galicia recordaron que a presentación dun recurso non exime a Adif do cumprimento do mandato do xuíz.

 

También te puede interesar