O Partido Popular ven de presentar na oficina do Valedor do Cidadán un escrito no que reflicte a «negativa do alcalde a facilitar documentos públicos solicitados» sobre as obras desenvolvidas nas rúas Areal e Camelias. Ademais da solicitude de amparo, achegouse o escrito «remitido ao alcalde, o pasado 1 de xullo – por Registro e que o 9 de xullo a Oficina de Supervisión de Proxectos e Obras – deu traslado do documento ao xefe de área de Fomento» no que se solicitaba acceder á documentación das dúas obras que, como lembrou o grupo municipal popular, forman parte das actuacións a executar por Aqualia.
«Tivemos que acudir a esta vía de actuación ante a falta de resposta á solicitude desa documentación«, lamentou o concelleiro Antonio Bernárdez, quen indicou que o PP «tería que recibir unha contestación aos cinco días dende a presentación de aquel escrito e xa pasaron dous meses».
O concelleiro subliñou que «é un asunto moi grave, porque se trata de documentos públicos, máxime cando o financiamento deses dous proxectos saen dos cartos que todos os vigueses pagan no recibo da auga, qué pasa, ten medo o goberno municipal a que se fiscalicen esas obras?» e «qué asunto turbio se esconde tras esas adxudicacións?«. O representate do PP, por último, acusou o goberno local de empregar a «represión» cara aos traballadores municipais «para que non informen sobre determinadas solicitudes da oposición».
Pola súa banda, o alcalde asegurou que «o goberno non ten ningunha solicitude do PP» sobre esa información e, ademais, engadiu que «tan pronto a solicite, en tres días estará á súa disposición, o tempo xusto para collela e pasarlla».
