@s traballador@s e o Comité de Empresa de Povisa puxeron fin ao peche que matiñan desde as 11 da mañá na delegación do Sergas en Vigo. A pesar de que reivindicaban ser recibidas por algún cargo do departamento ou da Consellaría de Sanidade, finalmente foi o xefe de inspección José Antonio Fernández e maila directora asistencial María del Mar Vélez quen se entrevistaron coas traballadoras, momento no cal decidiron suspender o encerro.
Porén, segundo María Xesús Neira, portavoz do comité de empresa, “unicamente se comprometeron a transmitir as reivindicacións”, e o cadro de persoal continúa “á espera dun encontro oficial com representantes da Xunta” que aínda non se produciu. Engadiu, ademais, que o conflicto en Povisa non se pode reducir a unha problemática laboral dunha “empresa privada”, tal e como sostén a administración, se non que o hospital forma parte da rede sanitaria pública “e por tanto o Sergas terá que esixir explicacións de en que están a empregar o diñeiro de todas”. Recordou, tamén, que os recortes no hospital privado están a afectar á calidade asistencial de cara aos usuarios, que por tanto “esta situación ten que rematar”.
O cadro de persoal de Povisa verá reducido entre un 40 e un 52% os seus salarios unha vez deixou de ter vixencia o convenio próprio e pasou a se aplicar o provincial, froito da nova reforma laboral e da negativa da empresa. Se non existe acordo, cousa que polo momento parece improbábel, as traballadoras iniciarán unha folga indefinida a partir do 19 de agosto.
