A Xunta comunicou este martes a Edgewater, empresa Mineira de Corcoesto que o proxecto de explotación «non cumpre os requirimentos técnicos e económicos» para ser aprobado e que «non autoriza estes plans por non cumprir as máximas garantías de viabilidade».
A Consellería de Economía e Industria reuniuse con representantes desta empresa, e pediulles que a empresa «acredite unha solvencia mínima do 25% de fondos propios sobre a inversión do proxecto e un compromiso en firme do resto do financiamento, así como a documentación que acredite a capacidade técnica da empresa para desenvolvelo».
«De non se cumprir axeitadamente os requisitos ambientais, técnicos e económicos, o proxecto sería rexeitado definitivamente e non se continuaría coa súa tramitación», avisou a consellería, que asegura que mantén a súa aposta por «unha minaría comprometida co país, innovadora e sostible».
O Goberno galego insistiu en que está de acordo con impulsar o «aproveitamento responsable dos importantes recursos minerais cos que conta Galicia» e o «desenvolvemento sostible dun sector que emprega máis de 7.000 persoas na comunidade e que supón máis do 1,2% do PIB galego».
Por iso, reiterou que «cada proxecto está sendo estudado pormenorizadamente» e seguindo «rigorosamente a normativa». «Só se autorizarán aqueles que favorezan o desenvolvemento económico e o benestar dos galegos, sempre que garantan a súa viabilidade ambiental, económica e técnica».
