Comarcas

Deputación e Consumidores de Galicia abren o martes oficinas de asesoramento a Afectados polas Preferentes

Deputación e Unión de Consumidores de Galicia (UCGAL) impulsan a creación dunha ampla rede de asistencia xurídica a afectados pola comercialización irregular de preferentes e subordinadas, á que a Administración Provincial destina 34.584 €.

Rafael Louzán, e o secretario xeral de UCGAL, Miguel López Crespo, asinaron este venres un convenio para a posta en marcha, de forma inmediata, de oficinas de asesoramento en diversos concellos da provincia, co obxectivo de orientar aos afectados á hora de reclamar a devolución do seu diñeiro pola vía xudicial e de orientalos e asesoralos nun “momento crucial” como é o actual, cando teñen que facer fronte ao troco e ás quitas.

As oficinas instalaranse na casa do concello de Tui, Ponteareas, Redondela, Cangas, Cambados, A Estrada e Lalín e nas sedes da Deputación en Vigo e Pontevedra.

As persoas que acudan a estes puntos de asesoramento, que comezarán a funcionar o vindeiro martes e permanecerán abertas durante un mínimo de dous meses, serán atendidas por persoal licenciado en dereito e perfectamente coñecedores da problemática da comercialización de produtos híbridos.

As oficinas estarán abertas ao público de luns a venres de 10 da mañá a 2 da tarde e, nelas, os expertos non só orientarán e informarán aos interesados sobre as posibilidades de acudir á vía xudicial, os pasos que deben dar, a forma de facelo, se teñen ou non dereito a xustiza gratuíta, senón que ofrecerá atención individualizada para que os afectados que decidan acudir á vía xudicial teñan todas as facilidades e a información adaptada ao seu caso concreto.

Trátase de que, ante unha eventual finalización das arbitraxes, aqueles que opten pola vía xudicial o fagan con todos os elementos de xuízo necesarios. Desta forma, os avogados que atenderán as oficinas de asesoramento analizarán as circunstancias de cada afectado; a súa relación coa entidade; a dinámica da contratación; os prazos fixos a posible vulneración de normas de protección ao cliente; se pode darse nulidade ou anulabilidade dos contratos; e, en definitiva, cantas circunstancias poidan analizarse nun procedemento xudicial.

 

También te puede interesar