O conservatorio Mayeusis celebrará este sábado 25 de maio, en Vigo, o seu III Concerto Solidario ‘Pon a túa nota a favor de Unicef’, o importe íntegro do cal de cada unha das entradas se destinará a vacinar 14 nenos contra a polio. O espectáculo, que por vez primeira combinará as artes escénicas e musicais, terá lugar no Centro Cultural Novacaixagalicia ás 7 e media da tarde.
Os organizadores salientan que o obxectivo deste acto é unir a música, a danza e o teatro «cun obxectivo de solidariedade» e de axudar a «descubrir, dende a diversidade, a responsabilidade por compartir o camiño con todos os habitantes do planeta, e en especial os nenos».
O concerto supón un reto organizativo para Mayeusis, xa que terá que coordinar a máis de 300 participantes entre alumnos e convidados deste conservatorio con idades comprendidas entre os 8 e os 68 anos de idade, que levan dende decembro pasado preparando este evento.
Colaboran neste concerto o trío El Sueño de Calíope, o solista Juan Abalde, e Abel Martín, do grupo escénico circense La Fiesta Escénica e a banda de gaitas Manxadoira. En total, serán 14 actuacións encadeadas entre si, divididas en dúas partes, na que a primeira se pode considerar escénica e a segunda ten un marcado carácter orquestral.
