RGPD - Cookies
Comarcas

O luns comeza a funcionar en Mos o servizo de recollida de animais abandonados

A alcaldesa de Mos, Nidia Arévalo e a concelleira de Medio Ambiente, Julia Loureiro, adiantaron hoxe de que o vindeiro luns entrará en marcha no municipio o Servizo Provincial de Recollida de Animais Abandonados.

Dita iniciativa chega despois do convenio marco de adhesión a este servizo asinado polo Concello de Mos que permitirá aforrar un 75%, xa que pasa de pagar os 16.000€ anuais que cobraba a empresa contratada para a xestión do mesmo, a pagar 4.000€ por medio do Servizo Provincial.

Segundo o Consistorio, o servizo de recollida de animais ten un elevado custo económico para un Concello e, a través do convenio do servizo provincial, os municipios pontevedreses con menos de 50.000 habitantes, tal é o caso de Mos con preto de 15.000 veciños, poden reducir custes na recollida de animais abandoados.

O importante aforro neste servizo ven dado pola prestación conxunta do mesmo en varios municipios e pola achega económica da Deputación Provincial.

Os animais domésticos abandonados recollidos por este servizo de lacería da Deputación de Pontevedra no termo municipal de Mos pasarán a ser xestionados polo Centro de acollida e protección animal de Armenteira.

Este centro de acollida e protección de animais abandonados, que está xestionado pola empresa pública estatal TRAGSA, será un referente a nivel provincial, xa que é o primeiro centro público destas características autorizado pola Xunta de Galicia en Pontevedra e que no mesmo a Deputación Provincial garantirá o máximo respecto ás necesidades, o benestar e dereitos dos animais adiantándose ó marco xurídico solicitado na resolución de xullo de 2012 da Eurocámara.

Os teléfonos de contacto ós que chamar a partir do vindeiro luns para solicitar o servizo de lacería son os seguintes: 606 803 081 e 981 953 558.

También te puede interesar