RGPD - Cookies
Galicia

Medra un 20% o número de familias que piden asistencia para os seus fillos por mor da crise

A Fundación Meniños, que traballa no apoio á reunificación familiar e na colaboración coas familias que presentan dificultades na atención e a protección dos seus fillos, viu incrementado entre un 15 e un 20% o número de familias en situación de dificultade que reclaman a súa axuda a causa da crise.

Así o sinalou este martes a directora xeral de Meniños, nunha rolda de prensa celebrada conxuntamente coa conselleira de Traballo, Beatriz Mato, para presentar iniciativas con motivo da conmemoración este 20 de novembro do Día Internacional da Infancia.

Sobre o labor da Fundación, Mónica Permuy asegurou que nos últimos meses se detectou un aumento do impacto da crise sobre familias en dificultades, o que leva consigo máis problemas para os nenos que viven nelas.

«A crise está a ter máis efectos nas familias nas que hai fillos», explicou Permuy, ao tempo que recordou que naquelas familias que se atopan en situación de «vulnerabilidade» e os fillos das cales están en situacións próximas á desprotección, a crise está facendo un daño máis apreciable. Os datos aportados por esta fundación coinciden, plenamente, cos resultados dun estudo, coñecido este martes, realizado polo Observatorio Social de España (OSE), que conclúe que a pobreza infantil medrou un 45% no Estado dende o comezo da crise, en 2007.

 

También te puede interesar