O deputado do BNG, Henrique Viéitez, formulou hoxe unha pregunta parlamentaria en comisión sobre os resultados das medidas adoptadas para erradicar a praga de nematodo do piñeiro nos concellos da comarca do Condado así como a posta en marcha dunha campaña informativa para o recoñecemento dos síntomas e evitar a súa propagación.
Na súa intervención, o representante nacionalista alertou dos riscos dunha praga que “aínda non remitiu” e lamentou que tras ano e medio, “o Goberno non aprendera a xestionala nin corrixira os aspectos negativos para os afectados”. Neste sentido, afirmou que “Medio Rural non contou co sector” e acusou á Xunta de “desleixo coas persoas afectadas” polo que pediu unha maior colaboración coas Comunidades de Montes.
Asemade, cualificou de “errática e descoordinada” a actuación do Goberno nos lugares máis afectados pola praga o que ao, ao seu xuízo, provocou máis preocupación e confusión á asociación de propietarios e as mencionadas Comunidades de Montes.
O deputado considerou que ademais da “ desconfianza” creada polo do proceder de Medio Rural, a situación tornouse máis grave coa “depreciación da madeira” e lembrou que o colectivo afectado utilizaba a extensión no monte e este produto para cubrir necesidades nun momento de grande crise económica.
Viéitez afirmou que a praga de nematodo repercutiu de maneira “moi negativa” no emprego local ante a falta do recurso da madeira o que provocou a presentación de expedientes de regulación de emprego en diversas empresas da comarca.
O parlamentario nacionalista denunciou o deterioro producido en muros, valados e camiños que a día de hoxe, “están sen recuperar” por mor do transito de vehículos nas parcelas e engadiu que tampouco foron aboadas as indemnizacións previstas.
Finamente, aludiu a unha carta enviada dende Medio Rural aos propietarios de piñeiros informando da necesidade da corta no caso de estaren secos e recriminou que a Consellería non cumprira o seu compromiso do estalado dos devanditos árbores cortados.
Medio Rural abrirá unha liña de axudas
Pola súa parte, o Secretario xeral de Medio Rural, Tomas Fernández Couto coincidiu co diagnóstico realizado polo nacionalista e avanzou que tras rematada a primeira fase para combater o primeiro foco e unha segunda de carácter preventivo, emprenderán novas medidas para paliar a situación entre as que priorizará “unha liña de axudas para os afectados”
Fernández, a instancias do BNG, comprometeuse as axudas económicas e garantir os traballos preventivos para erradicar as graves consecuencias do nematodo.
