O Señorío de Rubiós Condado do Tea Blanco foi proclamado este xoves, como “O mellor viño branco de Galicia 2011“ durante a entrega dos premios da XXIII Cata do Viños de Galicia que organiza a Xunta en colaboración cos diferentes consellos reguladores da comunidade galega. Ademais, o Señorío de Rubiós Albariño acadou o “Acio de Ouro“ en Rías Baixas, o que o sitúa como o mellor viño dentro da súa denominación de Orixen.
Segundo declararon os responsables desta adega “é unha excelente noticia que, ademais chega en plena vendima e que nos enche de orgullo e nos impulsa a seguir traballando con máis esforzo, adicación e motivación, para conseguir uns viños cada día mellores e que sexan do agrado dos consumidores”. O xerente de Señorío de Rubiós, Antonio Méndez, amosaba a súa ledicía e a de todos os socios desta adega pola consecución de tan importante recoñecemento “xa que nos fai especial emoción que o acadáse o Condado branco, un viño que non é tan coñecido como o albariño pero que ten un gran potencial, é moi expresivo e representanta moi ben as características das nosas uvas e das nosas terras”.
A entrega de premios, que conta con categoría de Concurso oficial español, tivo lugar no Mosteiro de San Clodio (Leiro) e contou coa presenza do presidente da Xunta Alberto Núñez Feijo e do Conselleiro de Medio Rural Samuel Juárez. As catas deste importante premio, que se celebraron o pasado mes de xullo e nas que participaron 185 caldos procedentes de 105 adegas das D.O. galegas, foron avaliadas por doce expertos.
