O ministro de Industria, Miguel Sebastián, acompañado polo delegado do Goberno o alcalde e o director da planta, visitou este martes a factoría viguesa de PSA Peugeot Citroën e asegurou que traballa «codo con codo» coa Xunta e co alcalde para traer a Vigo a factoría de baterías para coches eléctricos.
O titular da carteira de Industria recordou que o vehículo eléctrico representa «o futuro do automóbil» polo que respaldarán a PSA na súa construcción. Sebastián indicou que o apoio pode ser tanto en innovación como en infraestruturas de recarga, no que están a traballar conxuntamente con concellos como o de Vigo, apuntou.
Sobre a factoría de baterías recalcou que son «a clave para o desenvolvemento do vehículo eléctrico«, e explicou que, cara á súa instalación na cidade olívica, Vigo agora está na «final» xunto cunha localidade de Austria, cando partían un total de 10 urbes candidatas. O ministro pedíu «prudencia» ata a decisión final.
Miguel Sebastián afirmou que o obxectivo do Ministerio que dirixe é «facilitar» o uso do coche eléctrico, por eso están proxectadas axudas directas á compra e unha «tarifa superreducida» para recargar o vehículo pola noite.
O ministro recordou que o grupo PSA foi o segundo que máis axudas recibiu do Goberno de España no Estado para os seus plans de competitividade, 101,42 millóns de euros entre 2009 e 2010, asociados a inversión de 400 millóns, o que amosa que é unha das «prioridades» de Industria, e alabou a factoría de Vigo, «a máis produtiva e moderna» de España, «fundamental para a industria do automóbil nacional» e que «representa a innovación a competitividade e a internacionalización«.
