O alcalde de Vigo, Abel Caballero, asegurou este luns que o Concello duplicará o próximo curso o número de garderías municipais na cidade coa apertura de catro novas escolas infantís.
Despois da Xunta de Goberno Local, o rexedor socialista informou do visto bo municipal á desafectación do uso educativo do edificio municipal de Casiano Martínez para realizar obras de adaptación para gardería de cara ao vindeiro curso. Esta reforma custará 200.000 euros -con cargo aos fondos do Plan E do Goberno de España- e dará servizo á parroquia de Bouzas.
A segunda das catro novas dotacións educacionais estará ubicada en Tomás Alonso e tamén entrará en funcionamento no próximo curso. A remodelación custará tamén 200.000 euros con cargo ao Fondo Estatal de Investimento Local, segundo apuntou Caballero.
A terceira nova escola infantil para o novo curso xa está en marcha actualmente, sita en Mestres Goldar, e dará servizo aos veciños de Castrelos con especial atención aos traballadores da factoría viguesa de PSA Peugeot Citroën.
Xunto coas tres ubicacións xa reveladas, o alcalde asegurou que o Concello planea habilitar unha cuarta. Abel Caballero non fixo pública a súa ubicación pero si asegurou que estará operativa para o curso que ven.
Estas catro novas escolas para os máis pequenos súmanse ás catro de ámbito municipal que operan actualmente, co que o Concello duplica así a oferta no curso 2010-2011. Para o 2011 o alcalde agarda poder continuar co plan municipal de garderías e ampliar o número de escolas infantís municipais na cidade.
