Século XIX. Concepción Arenal e Emilia Pardo Bazán son pioneiras na reivindicación do acceso das mulleres á educación e Rosalía de Castro racha en vida e obra con arquetipo de muller romántica. Así comeza a exposición ‘Feminismo galego: cambios sociais e dereitos da muller’, organizada por Fundación Galiza Sempre e que recolle material co que se da testemuño dos obxectivos e demandas do movemento feminista. Con textos, publicacións, noticias e documentación gráfica, a mostra pretende contribuir a impulsar na sociedade galega a reflexión sobre os avances e cambios sociais promovidos polas entidades e organizacións defensoras da igualdade de dereitos das mulleres.
A exposición, que poderá verse desde esta tarde (20 horas) na Casa das Mulleres, coloca 25 m de paneis e expositores que repasan o avance de sufraxismo, a II República, a ditadura franquista, as agrupacións feministas galegas dos anos 70 e 80 ou o estado actual da loita feminista e repártese de balde un xornal que resume os principais contidos.
O guión e os traballos de investigación e documentación foron realizados pola investigadora Isabel Rodríguez Mate e recóllense fondos documentais de Nanina Santos Castroviejo, da revista Andaina de pensamento feminista, da Fundación 10 de Marzo, do Museo do Pobo Galego, e dos museos de Pontevedra e Massó. Ata o 5 de marzo poderás ver esta mostra que xa percorreu concellos como Santiago, A Coruña, O Porriño, Allariz ou Tomiño.
