
Carlos Díaz | vigoalminuto
O Porriño pechou este domingo as súas Festas do Cristo cunha cifra que dá a medida da dimensión da súa cita gastronómica: 15.000 racións de callos despachadas en 33 bares e restaurantes da vila durante a XXXIII Festa dos Callos. A celebración volveu levar á hostalaría o protagonismo dunha xornada na que tamén houbo música, ciclismo e actividades nas rúas.
A festa, organizada por Ahospor coa colaboración do Concello do Porriño, reuniu desde o mediodía tanto veciñanza como visitantes chegados doutros municipios. Entre os comensais houbo persoas procedentes de Vigo, Tui e Ponteareas, atraídas polas distintas versións dun prato convertido nunha das principais citas gastronómicas da Louriña.

Os 33 establecementos participantes prepararon as súas propias receitas a partir da base tradicional. A variedade chegou tamén a propostas máis afastadas da receita clásica, como os callos con macarróns ou as versións veganas, que ampliaron a oferta da celebración.
A actividade comezara xa ás nove da mañá coa saída da ruta ciclista do Día do Ciclismo desde a praza Arquitecto Antonio Palacios. Entre as 11.00 e as 15.00 horas, distintas prazas e rúas acolleron sesións de DJs, mentres os establecementos hostaleiros comezaban a recibir os primeiros clientes da festa.
A cifra deste domingo confirma o peso que a Festa dos Callos ten xa no calendario do Porriño. Na edición anterior foran 9.800 as racións servidas, polo que o salto ata as 15.000 deste ano supón un incremento de máis do 50%.
OuTraS NoVaS
- Cancelada la reunión con Xunta y Diputación: Caballero cita en su lugar a los clubes de fútbol
- Castelao volve ao escenario no Rosal cunha das grandes obras do teatro galego
- El alcalde exige a la Xunta que pague lo justo a los afectados por el Ofimático y garantice sus viviendas
- Novas ameazas de bomba obrigan a desaloxar colexios e institutos en varios concellos
- Los líos amorosos de ‘El otro lado de la cama’ vuelven con cuatro funciones





