O Porriño | C. Díaz
O Concello do Porriño iniciará este luns as obras de acondicionamento das parcelas situadas na contorna do Campo da Feira, na rúa Parque Infantil, para transformalas nun novo espazo público destinado ao deporte e ao lecer.
A actuación desenvolverase sobre unha superficie de 557 metros cadrados e contempla a creación dunha pista de baloncesto 3×3, outra para a práctica do fútbol e unha zona con elementos biosaudables para exercicio ao aire libre.
O proxecto tamén inclúe a instalación de porterías para fútbol sala e balonmán, unha canastra antivandálica e unha rede perimetral de protección. Os elementos biosaudables que xa existen na zona serán restaurados para garantir o seu funcionamento e seguridade.
As obras incluirán ademais a instalación dun sistema de drenaxe para evacuar as augas pluviais, unha rede de abastecemento de auga para rega e unha nova fonte pública. O espazo contará tamén con bancos, papeleiras e un panel informativo.
A intervención completarase con traballos de xardinaría, que incluirán a plantación de árbores, sebes e especies ornamentais para integrar o novo espazo na contorna.
Unha actuación dun mes
O contrato para executar os traballos xa está asinado e o prazo previsto é de aproximadamente un mes.
A actuación forma parte dun proxecto máis amplo para ampliar e renovar progresivamente a contorna do Campo da Feira. O Concello dispón xa de varias parcelas adquiridas e prevé incorporar novos terreos próximos para aumentar a superficie destinada a zonas verdes e crear unha área de lecer e encontro.
A intervención permitirá recuperar para uso público unha superficie actualmente sen un aproveitamento definido e incorporala ao ámbito do Campo da Feira con novos equipamentos deportivos e espazos de estancia.
OuTraS NoVaS
- SOS Sanidade Pública pide una Unidad de Grandes Quemados para Vigo
- El fuego, la rebelión y el pecado se citan esta noche en la ciudad
- O BNG propón duplicar o recargo do IBI ás vivendas baleiras de Vigo e elevalo ao 150% para grandes propietarios
- Grande Amore, teatro y música improvisada: seis planes culturales para este fin de semana en Vigo
- Convocada en Vigo una vigilia por Maricarmen y contra la especulación inmobiliaria
