O Porriño | A.Buendía
O Porriño conta con máis de 28.000 metros cadrados de aparcamento gratuíto, repartidos en oito parcelas do municipio, que suman máis de 1.100 prazas para vehículos. A rede busca facilitar o acceso ao centro urbano e aos principais equipamentos da localidade nunha vila na que a falta de estacionamento é unha das dificultades recorrentes para a mobilidade.
- O maior dos espazos sitúase na rúa Progreso, cunha superficie de 10.000 metros cadrados e capacidade aproximada para 450 vehículos. Nas proximidades, xunto ao paso a nivel, hai outra parcela de 1.000 metros cadrados.
- Na rúa Leandro Diz, ao carón da capela e do barrio de San Sebastián, habilitáronse outros 4.200 metros cadrados. Este espazo inclúe tamén unha zona destinada ao estacionamento de caravanas.
- A rede complétase con diferentes parcelas situadas xunto a equipamentos públicos e educativos. Na prolongación de Fernández Areal, fronte ás pistas de tenis e nas proximidades do centro de saúde, os xulgados e o pavillón municipal, dispóñense 3.000 metros cadrados.
- Na contorna dos centros educativos e deportivos localízanse outros 6.100 metros cadrados, repartidos en dúas parcelas de 3.700 e 2.400 metros cadrados, xunto aos CEIP Fernández López e Quiroga e preto do polideportivo municipal.
- A estes espazos súmanse outros 3.500 metros cadrados na avenida de Galicia, no centro urbano, e unha parcela de 500 metros cadrados nas inmediacións do cemiterio municipal.
Aparcar fóra do centro para acceder a pé
A distribución dos aparcadoiros pretende facilitar que os condutores poidan deixar o vehículo a poucos minutos a pé dos principais puntos do Porriño. O obxectivo é reducir a presión do tráfico no núcleo urbano e favorecer os desprazamentos peonís unha vez estacionado o vehículo.
Así, o Concello vincula tamén esta rede coa actividade do comercio e da hostalería, ao considerar que a dispoñibilidade de estacionamento pode influír nos hábitos de mobilidade de residentes e visitantes.
O alcalde, Alejandro Lorenzo, sinalou que a falta de aparcamento era unha das principais dificultades do municipio e defendeu a combinación de rúas máis orientadas ao tránsito peonil con alternativas de estacionamento nas proximidades.
O Concello elaborou ademais un mapa coa localización dos diferentes aparcadoiros, co propósito de facilitar a súa identificación tanto para a veciñanza como para as persoas que se desprazan ata O Porriño desde outros municipios.
OuTraS NoVaS
- O Porriño habilita máis de 1.100 prazas de aparcamento gratuíto en oito puntos da vila
- 7.788 menores desaparecieron en España en 2025
- Os vixiantes dos incendios forestais esixen á Xunta unha reclasificación profesional: “facemos máis e recoñécesenos o mesmo”
- Cielos con nubes y claros y bajada importante de las temperaturas, a partir del miércoles
- Quince años después, Iván Ferreiro recupera Castrelos con un concierto para la memoria de Vigo
