As Festas de San Bieito 2026, no Porriño, que se celebrarán os días 10, 11 e 12 de xullo, xa teñen un amplo programa que mestura tradición, música e actividades para todos os públicos.
Trátase dunha das celebracións con maior arraigamento no municipio, especialmente no barrio de San Bieito, onde cada ano centos de persoas participan nos actos relixiosos e festivos arredor dun santo ao que a tradición popular atribúe propiedades milagreiras, especialmente para curar problemas de pel como as verrugas.
Poxa das uvas
Un dos momentos máis agardados volverá ser a tradicional poxa das uvas, unha cita única que ten lugar tras a misa solemne e a procesión do 11 de xullo. A tradición sostén que é un milagre contar cun acio de uvas maduras nesta época do ano, circunstancia que provoca unha intensa poxa entre os asistentes. Na edición de 2025, un dos acios alcanzou os 250 euros e a recadación total, incluíndo outros obxectos poxados, ascendeu a 635 euros, unha cantidade que foi doada integramente á Asociación Española Contra o Cancro (AECC) do Porriño.
Kid Mount, protagonista do Mano de Santo DJ Festival
Un dos principais reclamos musicais destas festas será o Mano de Santo DJ Festival, que abrirá a programación o venres 10 de xullo a partir das 22.30 horas na Praza de San Sebastián.
O cartel estará encabezado por Kid Mount, considerado unha das voces emerxentes da música urbana galega, que combina trap, reguetón e hip hop con letras en galego. O artista estará acompañado polos DJs locais Shameless e Juan Demarco.
Segundo apuntou o alcalde, Alejandro Lorenzo, o obxectivo é ofrecer unha programación atractiva para todos os públicos e, especialmente, para que a mocidade poida gozar das festas sen saír do municipio.
Dobre aniversario musical
A programación tamén estará marcada por dúas celebracións destacadas. O sábado 11 de xullo, ás 20.00 horas, terá lugar un concerto conmemorativo polo 30º aniversario da Coral Polifónica EMMUS e o décimo aniversario da Agrupación Musical do Porriño, no que participarán arredor de setenta músicos.
A Coral Polifónica EMMUS é herdeira da longa tradición coral do municipio impulsada por Antonio Paz Valverde, mentres que a Agrupación Musical naceu no seo da Escola Municipal de Música, un centro creado en 1996 para facilitar a formación musical da mocidade do Porriño sen necesidade de desprazarse a Vigo ou Pontevedra.
A xornada do sábado completarase coa actuación da orquestra Salsarena ás 21.30 horas e cunha sesión musical protagonizada por Disquetoca e DJ Places a partir das 23.45 horas. O domingo 12 de xullo será a orquestra Miramar a encargada de pechar as festas.
OUTRAS NOVAS
- Último día de la Feria del Libro de Vigo: horario de actividades, presentaciones y firmas de este martes 7 de julio
- As Festas de San Bieito xa teñen programa: Kid Mount, a histórica poxa das uvas e tres días de música
- Tui volverá a vivir un España-Portugal con pantalla gigante, como en la histórica Eurocopa de 2012
- Baiona impón restricións á auga: prohibido encher piscinas, regar xardíns ou lavar coches coa traída
- Caballero cambia su versión sobre el túnel de Elduayen: ahora atribuye tres años de retraso a la Xunta
