Internet chega xa ao 95,5% dos fogares

Un total de 113.114 persoas incorporáronse ao uso de internet en Galicia entre 2021 e 2024. Nese mesmo período os fogares con internet contratado incrementáronse en 55.208 e son xa o 95,5% do total das vivendas galegas.

Os incrementos máis significativos rexístranse nos indicadores nos que Galicia presentaba os valores máis baixos, como nos concellos de menos de 5.000 habitantes, onde a contratación de internet nos fogares crece un 11,6% e sitúase por primeira vez por riba do 90%; e no uso de internet entre as persoas de 65 a 74 anos, que roza o 75%, cun aumento de máis dun 13% respecto ao ano pasado.

Estas datos, recollidos no estudo ‘Galicia. A nosa vida en dixital. A Sociedade da Información nos fogares galegos’. Edición 2024, que publica hoxe o Observatorio da Sociedade da Información en Galicia (Osimga).

Tamén en vigoalminuto

Uso de internet e velocidade das conexións

Preto do 94% dos galegos e galegas empregaron internet nos últimos tres meses en 2024. Así:

o uso da rede é practicamente universal nas franxas de idade dos 16 aos 44 anos
supera o 98% entre os 45 e os 54 anos
segue medrando entre os 55 e os 64 anos, onde acada o 93,2%
entre os 65 e o 74, roza o 75%

Cómpre destacar que Galicia incrementou os usuarios activos de Internet nun 5% dende o ano 2021, fronte ao 2% do conxunto de España e o 4,3% da Unión Europea.

Ademais do incremento de fogares con internet contratado, o estudo sinala un aumento significativo na contratación de conexións de alta velocidade: o 65,2% dos fogares conta con conexións superiores aos 100 Mbps, fronte ao 30% de 2021; e un 86,3% dos fogares dispón de internet de máis de 30Mbps.

A porcentaxe de galegos de entre 55 e 64 anos que usan Internet pasa do 30 ao 50%

Dispositivos dixitais e uso

O dispositivo electrónico máis estendido entre os galegos é o teléfono móbil con capacidade de acceso a Internet (smartphone). O 95,7% da poboación galega emprega unsmartphone. O seu uso é universal nas persoas de 16 a 44 anos, mentres que entre as persoas maiores de 65 anos sitúase no 83,4%.

Ademais, o 80,7% dos fogares dispoñen dun ordenador de sobremesa, portátil ou tablet, destacando o portátil como tipo de ordenador máis común (60,8%). As televisións intelixentes xa están presentes no 59,1% das vivendas, o que supón un incremento do 6,7% respecto a 2023 e dun 35,2% desde 2021. Tamén aumenta a presenza de altofalantes dixitais nos fogares, que xa se sitúa no 16,5%, un 6,5% máis que o ano anterior.

As actividades dixitais máis frecuentes inclúen:

a busca de información sobre bens e servizos (92,6%)
as videoconferencias (92,6%)
a lectura de noticias en liña (85,5%)
o uso da banca electrónica (81,6%)

Compras, administración electrónica e ciberseguridade

O 67,4% da poboación galega mercou por Internet en 2024, cun incremento do 5,5% no último ano. Así mesmo, o uso da administración electrónica en Galicia tamén continúa medrando e xa a empregan o 86,6% dos internautas. En canto á ciberseguridade, o 17% dos galegos declarou ter sufrido algún incidente no último ano.