A Central Unitaria de Traballadoras volve saír ás rúas o 1º de maio, Día Internacional da Clase Traballadora, como vén facendo dende o seu nacemento en 1999, este ano baixo o lema “25 anos sen renunciar á historia”.
Vintecinco anos de “sindicalismo combativo” na “defensa dos dereitos da clase obreira”, que este mércores percorrerá as rúas de A Coruña, Compostela, Ourense e Vigo nas seguintes convocatorias:
- Vigo 11h. Praza Fernando o Católico
- Ourense 12:30 h. Ponte Romana
- Coruña 12:30 h. Praza de Pontevedra
- Compostela 12:30 h. Praza 8 de marzo
En Vigo a manifestación partirá ás 11:00h da praza de Fernando o Católico nunha manifestación conxunta coa CGT e o Sindicato Ferroviario para rematar o percorrido na Porta do Sol.
“A clase traballadora non é unha suma de egos, senón un “eu” colectivo”
No seu manifesto a CUT subliña que “o 1º de maio é unha data que debemos recuperar na súa esencia, unha data que require reivindicar – dende a conciencia de clase- a nosa dignidade e os nosos dereitos; unha data na que o sindicalismo combativo ten que mostrar nas rúas que existe, porque só así somos quen de transformar a realidade social. A nosa proposta é a construción do individual dentro do colectivo, a clase traballadora non é unha suma de egos, senón un “eu” colectivo: somos eu porque somos nós.
Continúa asegurando que “se é o facho que guiou á CUT dende o seu nacemento hai xa vinte cinco anos, o facho que pretende manter aceso nas difíciles circunstancias que hoxe estamos a vivir“.
Nin o Estado nin a Xunta
Para Central Unitaria de Traballadores, “nin o estado español nin a Xunta de Galicia van solucionar os nosos problemas, tanto ten onde deleguemos hoxe o noso voto porque non hai quen represente ao pobo. O seu obxectivo é lexislar e lexislar para facer que fan; inventan solucións e inventan mil contradicións a resolver para esquivar as dúas contradicións principais: o sistema capitalista e España”.
Estas son “dúas contradicións que nos están tamén a levar a ser cómplices necesarios dun conflito bélico internacional para o que xa quecen motores e tamén nos levan a ser cooperadores necesarios no xenocidio de Israel con pobo palestino. A nosa obriga, como clase traballadora e polo tanto solidaria, non é outra que estar cos pobos oprimidos na trincheira da dignidade, custe o que custe”.
25 anos
No mesmo manifesto dende o sindicato engaden que “a CUT cumpre XXV anos, con moitos erros e algúns acertos, pero se de algo podemos estar seguros e seguras é de que seguimos a ser unha organización necesaria porque somos libres, non somos a correa de transmisión de ninguén (…)”.
