As organizacións sindicais CIG-Ensino, CCOO Ensino e SNEP denuncian o «inmobilismo das patronais na negociación do XIII Convenio Colectivo de centros de educación infantil, etapa 0-3″, e convocan 4 xornadas de folga e mobilizacións polas rúas galegas. Dúas delas serán na segunda quincena deste mes, os días 19 e 25, e outras dúas na 1ª quincena de novembro, os días 8 e 15. A protesta ten como xustificación «a defensa dos dereitos laborais, sociais e salariais das traballadoras das escolas infantís privadas e de xestión indirecta».
Máis dun ano de negociacións
Nesta liña, as organizacións sindicais convocantes amosan o seu malestar coa marcha das negociacións, que se iniciaron hai máis dun ano. Denuncian que «as patronais non souberon estar á altura das necesidades do sector». Tamén apuntan ao «incumprimento do compromiso acadado en xullo» e a ruptura da unidade sindical para «voltar ao entreguismo, por parte de UGT, USO e FSIE que deixan tiradas as traballadores dun dos sectores máis precarizados do noso país, que apenas cobran o Salario Mínimo Interprofesional e que non ven recoñecida a enorme responsabilidade social que ten o seu traballo».
Asi, apuntan, a “escusa” dada por estas tres centrais sindicais, «que actúan con total entrega á patronal como xa amosaron coa sinatura do que foi o XII convenio actual, é que non ven unha convocatoria de folga de tantos días e neste momento”.
«Non hai vontade de chegar a acordos»
As centrais convocantes aseguran que nas 10 reunións da mesa negociadora, comprobaron que as patronais non mostraron vontade de chegar a ningún acordo que permita ás traballadoras recuperar o poder adquisitivo perdido e obter uns salarios dignos e xustos, acordes coa responsabilidade do seu labor educativo e social coas crianzas.
Así mesmo, salientan, rexeitaron múltiples propostas feitas pola parte social no resto do articulado, no referente a melloras laborais e sociais; «ben non respostando ou mesmo propondo involucións en dereitos que non teñen xustificación dada a precariedade actual do convenio no seu conxunto».
Retribucións por baixo do Salario Mínimo
Entenden que a «actitude das organizacións patronais pon de manifesto a falta de vontade negociadora co ánimo de atrasar e evitar afrontar a necesaria actualización dos salarios». Seguindo este fío engaden que actualmente se atopan por debaixo do Salario Mínimo Interprofesional (SMI), «impedindo así que as traballadoras poidan recuperar o poder adquisitivo perdido». Ademais, conclúen, negan a necesidade de incrementar o diferencial salarial para as educadoras infantís e tamén se opoñen á aprobación dunhas táboas salariais equilibradas, dignas e xustas para todo o sector.
Por estes motivos, CCOO ENSINO, CIG-ENSINO E SNEP convocan esas catro xornadas de folga, a primeira o prómo xoves, 19 de outubro con manifestacións en Galicia. A de Vigo sairá ás 12:00h, dende o MARCO ate a Porta do Sol.
