O alcalde deu conta este martes, en rolda de prensa, do procedemento de adxudicación das 3.478 prazas para o programa municipal “Verán Xove 2022” que deu un paso máis este 6 de xuño co sorteo das prazas dispoñibles para as nenas e nenos nacidos entre 2005 e 2018.
Máis de 5.000 solicitudes
En total, o Concello recibiu 5.174 solicitudes de familias viguesas e, unha vez adxudicadas as prazas, poderá formalizarse a inscrición ata o 10 de xuño, de forma telemática, a través da web xuventudevigo.org. A partir do 13 de xuño, publicaranse as prazas que queden vacantes para a segunda adxudicación.
O programa municipal de campamentos de verán ten un orzamento de 335.900 euros, 109.000 máis que na edición de 2021, e incrementou en 1.110 prazas a oferta do ano pasado dada a suba da demanda.
