O Bloque Nacionalista Galego reiterou o seu «total apoio» á Federación de Asociacións Veciñais de Vigo «Eduardo Chao» (Favec) perante a «ameaza de seren desaloxadas da sede que ocupan desde hai varias décadas», nun edificio municipal.
Dende o BNG o seu concelleiro, Xabier P. Igrexas reclama que cese «a violencia institucional contra quen ousa discrepar do alcalde» e demanda alargar a calidade da democracia a nivel municipal cun novo regulamento de participación cidadá que «evite tics autoritarios e tiránicos e obrigue a escoitar a cidadanía».
Peche no local do Casco Vello
Igrexas estivo hoxe cos membros da Comisión Permanente da Favec, cando se vén de cumprir unha semana do peche que manteñen na sede ante a ameaza de desaloxo por parte do Goberno local. «Estamos perante unha inaceptábel represalia política contra a Favec. O mesmo alcalde que presume de ser a oficina antidesafiuzamentos da cidade pretende nada menos que desaloxar o movemento veciñal porque non lle din amen nin o adulan», denunciou.
Nese sentido, o portavoz municipal nacionalista criticou a crecente «deriva autoritaria» por parte do Goberno municipal. «Non se pode tentar afogar ou esmagar a quen discrepa e menos utilizando medios ou diñeiro público», reprochou. Aliás, Igrexas mostrouse certo de que «ningunha viguesa ou vigués que votou, lexitimamente, a Abel Caballero o fixo para que utilizase a súa maioría absoluta de maneira tiránica ou para ‘extorsionar’ politicamente a quen non pensa coma el».
Novo regulamento de participación cidadá
Igrexas lembrou que a primeira moción que promoveu o BNG no inicio deste mandato foi, precisamente, a de impulsar un novo regulamento de participación cidadá, como instrumento para alargar a calidade democrática e apostar decididamente por un maior protagonismo da veciñanza e dos movementos sociais. «Democracia non é só votar cada catro anos. Democracia é sobre todo diálogo e participación. É escoitar, sobre todo a quen pensa diferente. Como se fai no movemento vecinal todos os días», defendeu.
«Abel Caballero cre que gaña reducindo a cidade ao seu monólogo, cun pleno ornamental, cos movementos sociais silenciados por medo e amplificando o seu discurso con propaganda financiada con diñeiro de todas e todos. Pero así perde a cidade e a democracia. Vigo é unha cidade plural e diversa», remachou.
